Хангайн сайхан Хангал, Хялганатын ард иргэд, ажилчид, малчид, тариаланчид, ахмад буурлууд, залуус дүү нар, ирээдүйг цогцлоох хүүхэд багачууд та бүхэндээ “Булганы индэр” сониноор дамжуулан үйл ажиллагааны тайлангаа хуваалцаж буй өдрийн мэндийг хүргэе.

2022 онд Хангал сумын малчин түмний хөдөлмөрийн үр шимээр таван хошуу мал маань төрөл тус бүр дээрээ өссөн арвин амжилттай сайхан жил боллоо. Мөн иргэдийн хүсэн хүлээсэн Эрдэнэт-Хангал-Хялганат чиглэлийн 53,6 км авто замын ажил, ирээдүй хойч үе, хүүхэд багачуудын сурч боловсрох орчин нөхцөлийг сайжруулах 75 хүүхдийн цэцэрлэгийн барилгын ажил, хүүхдийн тоглоомын талбайн зураг төсөв, усан цамхгийн шугамын ажил, иргэддээ эрүүл мэндийн үйлчилгээг түргэн шуурхай үзүүлэх фургон автомашин зэрэг сумынхаа хөгжил цэцэглэлт, иргэдийн хэрэгцээ шаардлагад нийцүүлсэн олон ажлыг хийлээ.

Манай сумын түүхт 10 жилийн ой 2024 онд тохиохтой холбогдуулан бид 2022 оноос зарим ажлуудыг эхлэн явуулж байгаа ба айлчлан ирж буй 2023 онд иргэд, олон нийтийн оролцоог нэмэгдүүлэн олон олон шинэлэг ажлыг хэрэгжүүлэн төрөлх Хангал сумынхаа түүхт 100 жилийн ойг амжилт бүтээлээр дүүрэн угтахаар төлөвлөөд байна.

Аялал жуулчлалыг хөгжүүлж, байгаль орчноо хамгаалан, уламжлалт мал сүрэг, хөдөө аж ахуйг эрчимжүүлэх, орчин цагийн боловсрол, соёл, хөгжлийг зөв бодлого, Хангал, Хялганат нутгийн ард түмний ажилсаг хөдөлмөр чанар бол бидний хөгжлийн баталгаа юм. Бид иргэн таны хүсэлтэд үндэслэн төрийн үйлчилгээг сайжруулан ажиллах болно.

Та бүхэндээ эрүүл энх байж, элбэг хангалуун амьдрахын ерөөл дэвшүүлье.

Хүндэтгэсэн: Хангал сумын Засаг дарга М.Төмөрбат